Aroa Freije, ouro, e Raúl Blanco, bronce, na copa de Europa de Portugal.
Aroa Freije e Raúl Blanco tiveron unha magnífica actuación na Copa de Europa Youth de Portugal de Pentatlón Moderno, que se celebrou o sábado 12 de Abril na cidade de Pataias. Aroa Freije logrou a medalla de ouro na categoría feminina, mentres que Raúl Blanco foi terceiro e o mellor español dos tres presentes na proba. Esta proba é moi importante xa que os galegos sumaron moitos e importantes puntos para clasificarse para os Xogos da Xuventude, que terán lugar en China este ano.
Ambos deportistas foron moi regulares durante toda a proba, ocupando sempre as primeiras posicións. Aroa Freije foi a mellor na natación, cun tempo de 2:11:79, mentres que na esgrima perdeu algúns postos, ocupaba a cuarta posición na clasificación provisional ao remate desta proba. Pero fixo unha combinada espectacular e logrou a primeira posición e a medalla de ouro nesta Copa de Europa. Con este triunfo, Aroa deu un paso importantísimo cara a clasificarse para os Xogos da Xuventude.
Na categoría masculina, Raúl Blanco estivo a un nivel excepcional en todas as probas. Comezou cun segundo posto na esgrima, para despois facer o sexto mellor tempo na natación (2:08:09), que o colocou na terceira posición só a falta da combinada. Nesta proba confirmou a súa regularidade co cuarto posto e logrou esa importante medalla de bronce. Con este resultado, hai unha loita pechada por ese obxectivo, aínda complicado, de entrar nestes Xogos da Xuventude.
Tres medallas en Sant Boi na Copa Internacional de Pentatlón Moderno.
Ademais os nosos deportistas máis pequenos acadaron tres medallas na Copa Internacional de Pentatlón Moderno de Sant Boi de Llobregat (Barcelona), que se celebrou hoxe coa participación de deportistas de Italia, Francia, Cataluña e Galicia.
Na categoría infantil masculina houbo dobrete galego, Martín Freije logrou a medalla de ouro e Javier Pena a de prata. Mentres que na categoría feminina, Andrea Vidal quedou moi preto do podio, coa cuarta posición, fixo unha natación moi boa logrando o mellor tempo. E a terceira medalla galega chegou da man de Lucas Pena conseguindo un bronce na categoría alevín.